مدونة عبدالرحمن الخميس

أثناء إجتماعنا اﻻسبوعي في التوست ماستر نحتاج نصوت على تقريباً كل شي , نحتاج نصوت على أفضل واحد ألقى خطاب وأفضل واحد بالـTable Topics وهي فقرة من الفقرات اللي تقوم تتكلم بدون أي تحضير وتقريباً نصوت على كم فقرة. السالفة انه عملية التصويت كانت تاخذ مننا وقت طويل , ﻻنه كل مرة يحتاج يوزع عليك أوراق التصويت ثم كل واحد يكتب اﻻسم اللي يبي يصوت له , ثم يعاد جمع اﻻوراق وأخيراً يتم فرز اﻻوراق وعد اﻻصوات للاعلان عن الفائز .. العملية هاذي نسويها أكثر من مرة وكان فيها مضيعة للوقت بشكل كبير .. ففكرت انه ليش مانحول العملية هذي ونبسطها على شكل تطبيق يختصر الوقت هذا .. على طول كلمت صديقي حسام الزغيبي وقلت له عن الفكرة ووافقني وقال قدام نبرمجها .. والحمدالله ثلاث جلسات وحنّا منتهيين من البرنامج والتصميم.

بالبداية فكرنا بأنه البرنامج يكون على الهواتف الذكية زي اﻻندرويد واﻻيفون , لكن هذا راح يخلي البرنامج محدود وﻻزم واحد بالنادي معه هالهاتف الذكي عشان يستخدم هالتطبيق وإضافةً على ذلك بنحتاج نبرمج على كل منصة منهم وراح ياخذ مننا وقت .. شي ثاني كنا نبي برنامج تقدر تستخدمه بأي مكان .. يعني مايحتاج إتصال بالنت عشان تستخدم هالبرنامج .

بعد ماحددنا أهدافنا في البرنامج قررنا إننا راح نبرمجه بالـ JavaScript يحيث انك فقط تحتاج متصفح عشان تشغل برنامجنا , سواءً عاد متصفح جوال أو كمبيوتر الخ.. والمدخلات اللي تخزنها بالبرنامج راح تفقدها أول ماتسكر الصفحة.

أول مرة جربنا البرنامج كان على ﻻب توب وكان العملية ممتازة لكن مهب بالشكل المطلوب , كان السيناريو انه كل واحد يروح يصوت باللاب توب الموضوع في نفس الغرفة , يعني تتطلب ان الواحد يروح بنفسه كل مرة يبغى يصوت  .. العملية اختصرت الوقت لكن موب بالشكل المتوقع.

المره الثانيه جربت التطبيق على الحاسب اللوحي اﻻيباد وكان البرنامج بدون أي تعديل طالع شكله ممتاز على اﻻيباد وعملي ! فجربناه في النادي وكانت العملية جداً ممتازة وسهلة وأعجبت الشباب. هذي عدة صور للبرنامج على شاشة اﻻيباد: ” اضغط على الصور لحجم أكبر “

ولمن أراد التجربة وتقديم الإقتراحات من هذا الرابط 

http://alturl.com/cmc7c

يوجد أخطاء في البرنامج أو يمكن أسميها إضافات راح تحسن من إستعمال البرنامج راح أضيفها قريب إن شاء الله قبل أنشر البرنامج , أفكر أعيد تصميمه لشاشات اﻻندرويد والايفون مع إبقاء استخدامه من المتصفح.

الحمدالله كان ظننا بمحله والبرنامج صار له حاجة ولمسنا الشي هذا بالنادي حقنا , مع إنه برنامج بسيط إلا اني استفدت الكثير منه .. أشكر صديقي حسام الزغيبي على تعاونه الرائع معي وإني جداً استمتعت بالعمل معه على هذا البرنامج :).