مشروع التخرج هو متطلب أساسي قبل التخرج وذلك ضمن الخطة الدراسية لتخصص علوم الحاسب في جامعة القصيم, المشروع يكون على سنه كاملة بحيث الفصل اﻻول يكون أكاديمي وذلك يتضمن كتابة :
- Introduction المقدمة
- Literature Review المراجعة اﻻدبية
- System Design تصميم النظام
والفصل الثاني يتضمن:
- Implemetnation البناء أو التطبيق
- Testing اﻻختبار
- Conclusion الخلاصة
والصراحة الحمدالله كانت تجربة جداً ممتازة لنا وبتوفيق الله تعالى ثم إشراف وكيل كلية الحاسب الدكتور: عبدالله الناجم وبشريكي المميز سليمان الشيحي حصلنا على جائزتين على مشروع تخرجنا والذي كان عنوانه “Anti-Phishing Detection Tool “
:
اﻻولى وهي على مستوى المملكه العربية السعودية .. وكانت في موضوع أفضل مشروع تخرج في أمن المعلومات والذي أقامها مركز التميز لأمن المعلومات وحصلنا على المركز الثالث
والثانية كانت على مستوى قسم علوم الحاسب في جامعة القصيم .. حصلنا على أفضل مشروع تخرج ولله الحمد
نجي للسؤال المهم اللي هو .. وش اللي تعلمت من مشروع التخرج ؟
- مشروع التخرج ليس عبارة فقط عن خبرة تقنية أو برمجية
- مشروع التخرج يعلمك كيفية إدارة المشاريع وكيف انه هناك وقت لتسليم كل مهمة
- مشروع التخرج يعلمك الكتابة اﻻكاديمية
- تعلمت كيف العمل كفريق واحد وكيف ان فريق العمل جداً مهم ومؤثر على سير المشروع
- كيفية كتابة المصادر وفق معايير معتمدة من جامعات عالمية
- مشروع التخرج يعلمك ترتيب اﻻولويات وكيفية العمل تحت الضغط
أنا متأكد اني نسيت بعض الحاجات اللي علمني اياها المشروع , لكن هذا بعض من اللي تعلمته .. طيب وش نصيحتي لك كطالب أو كطالبه مقبل على مشروع التخرج ؟
- الفريق ثم الفريق ثم الفريق !
- الفريق جداً جداً مهم في تمام المشروع ونجاحه ! حط ببالك هالمقوله ” الحي يحييك .. والميت يزودك غبن ” يعني انه اذا كان معك فريق نشيط وطموح ! فغصب عليك راح تشتغل وتحس بالحماس ! أما اذا كان معك فريق يجيب الهم ةويأجل كل حاجه ﻻخر شي .. فالله يعينك ! أحيانا يجيك فترات الهمة تقل , فتحتاج احد يشد على إيدك وتزود الهم
- موضوع المشروع
- حاول تختار مشروع قريب لاهتماماتك ! ﻻنه اللي قريب ﻻهتماماتك راح تبدع فيه بلا شك ! أنا عارف أحياناً هالموضوع ماهو بإيدك ! لكن حاول قد المستطاع انك تسوي هالشي !!
- مشرف المشروع
- برضوا عارف هالشي في احيان كثير ماهو بإيدك ! لكن سددوا وقاربوا ! حاول تختار واحد يقبل الافكار الجديده أو واحد عنده خبره ويقدر يدلك ويفيدك ! أهم شي إبعد عن المسوف واللي مواعيده مواعيد عرقوب !
اممم أنا متأكد في أشياء غير اللي ذكرتهم .. لكن هذا اللي طرى في بالي حالياً ! لكن حاول وأنت تختار المشروع انك تشوف هل هالمشروع والله له صدى في سوق العمل أو لا ؟ يعني صراحه حلو لما تسوي شي وتجيك بكرى شركه مهتمة في اللي أنت سويته ! فممكن لو تلقي نظرة على متطلبات سوق العمل ! أو إحتياجات الشركات ووتترجم هذي المتطلبات لمشروعك ! لكن هالموضوع يحتاج وقت !
برضوا ممكن لو تاخذ مشروع مفتوح المصدر وتضيف عليه أو تعدل ومن هالشغلات ! لانه من اﻻشياء اللي تقهر صراحه انه كثير من مشاريع التخرج ! ماتت من وقت ماتخرج الطالب ! وراح جهده اللي سواه .. فيعني مشاركتك بمشروع مفتوح المصدر راح تكون فعالة وتكون أضفت جزء يحتاجه المشروع .
هذي خلاصة تجربتي المتواضعه جداً ! وحياكم الله في أي استفسار .
ما شاء الله تبارك الله ، شيء جميل جدًا اللي سويته عبدالرحمن
فعلًا اتفق معك في اغلب النقاط اللي ذكرتها بخصوص الفريق ،
و بالنسبه للمشروع تبعك هل كان الاعتماد كليًا على كورس السكيورتي ؟
انا الآن طالبة حاسب (نظم معلومات) و هذه سنه التخرج ، و محتارة كيف الشكل النهائي للمشروع يعني هل بيكون بصورة (ويب سايت) عبارة عن نظام يؤدي وظائف معينة او كبرنامج يستخدم في الاجهزة ؟ او كتطبيق من التطبيقات الاخرى المنتشرة ؟ فالمقصود في خلال فترة عملك على مشروعك المشرف هو اللي وجهك للشكل النهائي المطلوب ؟
و بالنسبة للمواضيع و الافكار للمشروع هل سنلزم بعمل الافكار اللي تنزلها الجامعه ؟ او ناخذ الفكرة و نطورها ؟
الحمدلله الفريق موجود و مضمون و ذو همة و نشاطية عالية : )
و لكن نفتقد للفكرة 🙁 .. اعجبتني النقطة اللي ذكرتها بخصوص انه يكون المشروع يكون له صدى بسوق العمل ،
فاللحين من خلال الفترة اللي تخرجت و عملت فبها و رؤيتك لسوق العمل ما هي ابرز العناوين اللي تنصحني فيها ؟
شاكرة لك عبدالرحمن تدوينة حمستني جدًا .. بإنتظارك
حياك الله ,
امممم ماقد اخذنا كورس سكيورتي اصلاً و اخذنا مرة كورس cryptography
بالنسبة للشكل النهائي, تشاوري انتي والفريق اللي معك, حنا كان على شكل مراحل وكل مرحلة كان طريقة عرضها غير, وكان المشرف جزاه الله خير مخلي لنا الحرية في اختيار الشكل النهائي للمشروع.
– والله اذا كان الفكرة من عندك وشي متحمسه له يكون أفضل, لكن يبي لك تقنعين القسم فيها وتكون المدة كافية لتنفيذها.
– بالنسبة للفكرة , اﻻفكار كثيرة جداً لكن خلوا مشروعكم يندرج تحت تخصص من تخصصات الحاسب او مجال , زي الشبكات أو الحماية أو الحوسبة السحابية , الفكرة تحتاج وقت للبحث.
– الله يوفقك ياختي وإن شاء الله تبشريننا بنجاح مشروعك وﻻ تترددين بأي استفسار.